Gianni Rodari foi un mestre na arte de contar historias; e ben que o demostrou nos seus "Contos por teléfono". O ilustrador Alessandro Sanna proponnos neste álbum revisitar unha sorprendente Carapuchiña para xogar a "romper" todo o coñecido.

Un avó interrompe a plácida lectura do xornal para contarlle á súa neta un conto que, non por máis clásico, lle resulta menos difícil de narrar. Descoñecemento? En absoluto. O avó consegue que sexa a nena a que realmente reproduza o relato, corrixindo os erros que deliberadamente comete porque confundindo historias é como o enredo se converte nun proveitoso recurso expresivo. Esta peculiar visión de Carapuchiña -ideal para ser contada- é un xogo de humor para o lector e, para os contadores de contos, toda unha lección -útil e sinxela- sobre como sentir a emoción vibrante do público infantil e lanzarlles un irresistible anzol diante do voraz apetito da súa imaxinación para manter a súa atención alerta.

4º-5º-6º Educación Infantil